Máis sobre as leiteiras

En Santiago de Compostela consérvase o Arco de Mazarelos, coñecido entre os composteláns simplemente coma "O Arco", vestixio das murallas que rodeaban a cidade. Intramuros está a praza do mesmo nome, presidida pola estatua de Montero Ríos, frente á que fora escola de novicios da Compañía, actual Facultade de Filosofía.

Este era o lugar no que se reunían tradicionalmente as leiteiras que repartían o leite no casco histórico da cidade para compensar entre elas o que lles sobrara a unhas e lles faltara ás outras por teren algún pedido extraordinario. O caso era voltar á casa coas caldeiretas baleiras.

Os informantes de máis idade lembran o penetrante cheirume a mexo dun recuncho da praza, que se explica simplemente pola inexistencia de baños públicos e non, como pretenden algúns, polo afán de adultera-lo leite.