Curiosidades

O "Padriño seco":

Dicíase do que non lle levaba ó seu afillado o "bolo" pola Páscoa, tal como era costume na sociedade tradicional galega.

Curiosidades

"MATAR JUDÍOS":

Así lle dicían nalgúns lugares de Castela a tomar limonada ou sangría, feita con viños da zoa.

Costume propia da Semana Santa, sobre todo o Vernes Santo, e da Páscoa.

(Informante: N.M.F., natural da provincia de Valladolide).

Curiosidades: dous trabalinguas...

...que son tamén dúas adiviñas:

Pinguilín, Pinguilín está pingando

e Minguilín, Minguilín está mirando:

si Pinguilín, Pinguilín cayera,

Minguilín, Minguilín lo comiera.

(Pinguilín son os chourizos e Minguilín é o gato)

Estaba Pinguín pingando

e estaba Focín fozando;

veu Rapín rapando

e levouse a Focín fozando

e deixou a Pinguín pingando.

(Pinguín son os chourizos; Focí é o porco e Rapín é o matachín)

Curiosidades: a creatividade popular

Santa María,

morreu miña tía:

¿Cando se enterra?

Mañán polo día.

Dáballe berzas

e nonas comía;

dáballe papas,

¡que ben lle sabían!

Cando cocía

facíame un bolo;

cando choraba,

comíamo todo.

Curiosidades: picaresca

Durante os últimos anos da Guerra Civil española os alimentos escaseaban, sobre todo nas grandes cidades e xente recorría á súa imaxinación, uns para alimentarse eles e mailas súas familias, outros para beneficiarse economicamente da situación.

En Barcelona, segundo unha das nosas testemuñas que pasou aló os anos da Guerra, a alguén se lle ocorreu, para elaborar máis pan, alimento básico na época, misturar a fariña coas mondas do plátano. Ó enfriar o pan, o plátano soltaba auga que ía humedecendo pouco a pouco o molete e o pan botábase a perder ás poucas horas.

¡O negocio non properou, claro está!

Curiosidades: París-Dakar

"Face-lo París-Dakar":

Non se trata de participar no popular rally de aventura que, nos seus inicios, transcurría entre as capitais de Francia e O Senegal, atravesando o deserto do Sahara, senón dun roteiro entre os café-bares "París", na rúa de Bautizados, e Dakar", na rúa do Franco, na cidade de Santiago de Compostela.

Nest caso os participantes recorren tódolos establecementos de hostelería situados sobre o traxectos, ¡que non son poucos!, tomando viños ou cañas e degustando as tapas típicas de cada un deles.

Curiosidades

Alcumes: O Hinchavacas;

Era un coñecido tratante compostelán que, ó rematar a Guerra Civil se adicaba a mercar vacas para o Exército.

Co fin de multiplicar os seus beneficios, o día que as tiña que levar ó ferrocarril botáballe sal na comida para que beberan moito e retiveran líquidos, pois pesábanas antes de subilas ós vagóns do tren. Cando chegaban ó seu destiño as vacas perderan unha porcentaxe importante do seu peso.

Curiosidades: patacas parideiras

Trátase de patacas que, conservadas nun ambiente cálido e seco, etre papel de periódico, por exemplo, reventan porque no seu interior medrou outra pataca.

Conservo unha pataca parideira desde o ano 2003 que, co paso do tempo, petrificouse, tendo actualmente o 59% do seu volume orixinal.

Descoñezo o nome científio deste fenómeno, o de "parideiras" puxémosllo o meu desaparecido amigo L.Q.M. e máis eu porque o seu aspecto recorda ó do feto saíndo do útero materno, ¡fóra a i-alma!, como diría os nosos devanceiros.